Friday, March 16, 2012

හිතට වැදුනු ලිපියක් ...

The Last Station (2009) | ජීවිත ගමනේ අන්තිම නැවතුම…[සිංහල උපසිරැසි සමඟ]

 

 ලිපියේ හිමිකරු :- “උදා”
…ලිපිය උපුටා ගැනිම :- බයිස්කෝප් සිංහලෙන් (මෙතනට කොටන්න..)

 සිංහල සබ් එක්කම චිත්තර පටිය බලන්න බයිස්කෝප් සිංහලෙන් වෙත යන්න

“සෑම සාර්ථක මිනිසෙකු පි‍ටුපසම ගැහැණියක් සිටියි” මේ ප්‍රකාශය සිදු කළේ කවුරුන්දැයි කියන්න මම දන්නේ නෑ. ඒ වුණත් මේක කිව්ව කෙනා තව කරුණු රාශියක්ම නොසලකා හැර තිබෙනවා. මම එහෙම කියන්නේ මේ ලෝකේ මිනිසුන්ගෙන් වැඩි පිරිසකගේ පි‍ටුපසින් ඉඳන් කාන්තාව මෙහෙවරක් කළා වුණත් ඇතැම් මිනිසුන් අසාර්ථකත්වයට පත්වන්නේත් ගැහැණුන් නිසාම වීම සහ ඇතැම් සාර්ථකත්වයට පත් මිනිසුන් විඳවන්නේත් ගැහැණුන් නිසාම වීම හේතු කොටගෙනයි.

ඔබ දන්නවා ඇති ගැහැණුන් නිසා අසීමාන්තික ලෙස වදවේදනාවන්ට ලක් වන මිනිසුන් අදටත් සිටිනවා, ඇතැමෙකුට ඒ මව, කෙනෙකුට පෙම්වතිය, තවෙකෙකුට බිරිඳ, සමහරෙකුට වෙනත් කතක්… මේ ආදී ලෙස මේ සමාජයේ සෑලකිය යුතු මිනිසුන් පිරිසක් කාන්තාවන් නිසා වේදනා විඳිනවා. ඒ තත්ත්වය සාමාන්‍ය අපට පමණක් උරුම වූවක් නොවෙයි. ලෝකයේ ශ්‍රේෂ්ඨත්වයට පත් වී, බුහුමන් ලබන මිනිසුන්ටත් පොදු තත්ත්වයක්. ඇමෙරිකාවේ හිටපු ශ්‍රේෂ්ඨතම මානවවාදි ජනපතිවරයෙක් වන ඒබ්‍රහම් ලින්කන් තම බිරිය නිසා අතිශය දරුණු මානසික වදවේදනාවන්ට මුහුණ පෑ අයෙක්. ඒ වගේමයි ලෝක පූජිත මහා ලේඛක ලියෝ ටෝල්ස්ටෝයි. අද දක්වාත් ලොව පහළ වූ අතිශය ශ්‍රේෂ්ඨතම නවකතා නිර්මාණකරුවා හැටියට පිදුම් ලබන්නට ඔහු වාසනාවන්ත වූයේ ‘ඇනා කැරනිනා’ සහ ‘යුද්ධය හා සාමය’ යන නිර්මාණ ද්වය හේතුවෙන්. අද වන විටත් ලොව අග්‍රගන්‍යම නවකතාව ලෙස සැලකුම් ලබන්නේ මේ ‘යුද්ධය හා සාමය’ නවකතාව වුණත් ඔහුත් සිය බිරිඳගේ කටයුතු නිසා මහා දරුණු මානසික වේදනාවන්ට පත් වූ අයෙක්.
මම මින් පෙර වතාවකදී ඔබ වෙත ගෙන ආවා ‘චේ ගුවේරා‘ ගේ තරුණ වියේ කතාව. එහිදී මම කිව්වා දුක්ඛිතයන්, පීඩිතයන් වෙනුවෙන් සිය පණ පිදූ අය මෙන්ම තම ඉසුරුමත් දිවියේ මහේශාඛ්‍යය ඔවුන් වෙනුවෙන් කැප කරන්නට, ඔවුනගේ යහපත වෙනුවෙන් පුදකරන්නට සැදී පැහැදී හුන් මිනිසුනුත් මේ ලෝකයේ සිටි බව. ලියෝ ටෝල්ස්ටෝයි ඒ වගේ කෙනෙක්. චේ ගුවේරා තමන්ගේ පණ පිදුවේ අසරණයන්ගේ ජීවිත යහපත් කරදෙන්නටයි. ටෝස්ටෝයිට අවශ්‍ය කළේ පෞද්ගලික දේපළ ක්‍රමය වෙනස්කොට එය කාටත් සම අයිතීන් සහ අවස්ථා හිමිවන පොදු දේපළ ක්‍රමයක් බවට වෙනස් කරලීමටයි. ඒ සඳහා ඔහු නිදහස්වාදී සමාජයක් බිහි කිරීමට වැර දැරුවා. එකම අරමුණ වෙනුවෙන් චේ ගත් මග ප්‍රායෝගික සන්නද්ධ ජන අරගලයක් බවට පත් වෙද්දී ටෝල්ස්ටෝයි ඒ සඳහා ‍තෝරාගත්තේ චින්තන විප්ලවයක් වුණා. ඒ ඔස්සේ ඔහුගේ ඒකායන අරමුණ වුණේ තමාට තම සි‍ටුවර පෙළපතින් උරුම වූ දේපළ ඉඩකඩම් පොදු ජනයාගේ ප්‍රයෝජනය සඳහා බෙදා දීමයි. ඒ අයුරින් මුළු ලොවේම පොදු දේපළ ක්‍රමයේ ක්‍රියාත්මකභාවය සනාථ කරනු පිණිසත් නිදහස් පොදු ජන ජීවන ක්‍රමයක් ස්ථාපිත කිරීම පිණිසත් සංවිධානයක් පිහි‍ටුවාලමින් එය ලෝකය පුර ප්‍රචලිත කරමින් මුළු ලොවම ඊට පොළඹවාලීමටත් තැත් කළා. ඒ තමන්ගේ යැයි දෙයක් නොමැතිව අනුන්ට කඹුරමින් ජීවිතයම ගෙවා දමනවුන්ගේ වෙහෙස ගැන ඔහු වටහාගත් නිසා. ඒ වෙනුවෙන් ඔහු පෙනී සිටිමින් උත්සාහ කළේ “කිසිවෙකුට කිසිවක් හිමි නැති, සැමදෙයම කාටත් හිමි” සමාජයක් ගොඩනැගීමටයි. මේ කටයුත්තේදී ඔහුට සතුරුව කටයුතු කළ විශාල පිරිසක් සිටියා. ඒ අතරින් ටෝල්ස්ටෝයි සි‍ටුදේවියත් එක් අයෙක්.
ටෝල්ස්ටෝයි කෙතරම් නම් මේ අරමුණ සඳහා කැප වුණාද කිව්වොත් තම දරුවන්ගේ උරුමය වන දේපළ සහ ඉඩකඩම් පමණක් නෙවෙයි තමාගේ වෙහෙසත් මෙහෙයත් වන තම නිර්මාණ පවා සියළූම මිනිස් වර්ගයාගේ යහපත උදෙසා මුළු මහත් මනුෂ්‍ය සමාජයේම අයිතියට පවරා දීමට ඔහුට අවශ්‍ය වුණා. නමුත් සි‍ටු දේවියට අවශ්‍ය කළේ එහෙම නොවෙයි. ලෝක ආගම් අතරෙහි සම්මුතියක් ගොඩනැගීමට උත්සාහ කළ අය අතුරිනුත් ටෝල්ස්ටෝයි හට හිමි වන්නේ සුවිශේෂී ස්ථානයක් වුවත් ඔහු අනාගමිකයෙක්. ඔහුගේ ආගම වුණේ මානව-ප්‍රේමය. මිනිසාගේ සුභසිද්ධිය තම පරමාර්ථ කොටගත් මේ ශ්‍රේෂ්ඨ මිනිසාගේ ජීවිතයෙන් බිඳක් මෙලෙස සිනමාවට නැගුණේ 2009 වසරේදී. ඒ ‘ජේ පරිනි’ ගේ නිර්මාණයක් ඇසුරින්.
මේ චිත්‍රපටයේ ලියෝ ටෝල්ස්ටෝයිගේ චරිතයට ‘ක්‍රිස්ටෝපර් ප්ලම්මර්’ පණ පොවන අතරේ ටෝල්ස්ටෝයි සි‍ටුදේවියට පණ දෙන්නේ ‘හෙලන් මිරන්’. මේ දෙදෙනාගේ රංගනය කෙතරම් උත්කෘෂ්ඨදැයි කිවහොත් හෙලන් මිරන් 2009 වසරේ ඇකඩෙමි සම්මාන උළෙලෙහි හොඳම නිළිය සම්මානය සඳහා නිර්දේශිත නම් අතරට එක් වෙද්දී; ක්‍රිස්ටෝපර් ප්ලම්මර් හොඳම සහය නළුවා සම්මානය සඳහා වූ නිර්දේශිත නම් අතරට එක් වුණා. අධ්‍යක්ෂණය මයිකල් හොෆ්මන්ගේයි. එසේනම් මේ ශ්‍රේෂ්ඨ මිනිසාගේ ජීවන තතු බිඳක් සිංහල උපසි‍රැසි සමගින් විඳගන්නට අවසරයි.
ප. ලි. මාගේනම් අදහස යම් සිනමා රසිකයෙකු මෙය නොබලා සිටීම ඔහුගේ ජීවිතයේ අත්විඳිනා අති මහත් වූ පාඩුවක් වන බවයි. මාගේ නිර්දේශයට අනුව මෙය සෑම අයෙකුම විසින් අනිවාර්යයෙන්ම නැරඹිය යුතු චිත්‍රපටයක් ලෙස දැක්වීමට කැමතියි. මෙහි සුළු වශයෙන් නිරුවත් දර්ශන ඇතුළත් වන බවද සැලකිය යුතුයි!

One Response so far.

  1. වැඩේ නියමෙට කරලා තියනවා

Leave a Reply

දාමු බලන්න කමෙන්ට් එකක්

 
 

About Me

My photo
මොනවාකියන්නද හිතාගන්න බැ. බොහොම සරල කෙනෙක්. බුකියේ මෙ මන් http://facebook.com/pissupusa G+ වල මන් https://plus.google.com/108639370171940303617/posts